Touts felibres (2)
Bous aus, qui boulets hè demoura lous gouiats sur la terro de la petito patrîo, lous hè aima las balochos dou bilatge mès lèu que las hèstos de la bilo, lous hè arrise dambe las couiounados basudos enta nous aus mès lèu que dambe las salouperîos de tant de papès francimans, qu’èts felibres, felibres dou cap aus pès !
Besèts dounc, adaro, ço qu’es un felibre.
Felibre qu’es, quin omé que se sîo, riche ou praube, escouliè ou regént, quan aimo e hè aima à soun entour tout ço qu’aimauon lous bielhs.
Pramou, lous bielhs, se soun lou gran de blat de batèros, madurat au soureil de Juilhét e batut à gran cots de lagèts s’ou so de la bordo ende da la harîo e lou pan de l’Iuèr ; que soun tabé lou gran de la semenço que lous joèns, à peno de mouri de malo hame, diuran jita à plén pugnat déns lou barèit !
E qu’es ço qu’aimauon lous bielhs ?
Lous bielhs de bèt tems a, qu’aimauon la terro – la terro qui hè base lou blat e las bits, la terro touto caperado de las cenes de nostes morts … Aimerats pas la terro, bous aus, lous joéns ?
Lous bielhs qu’aimauon las belhados – las belhados à l’entour du larè, quan lous gouiats destanoucauon lou milhoc, quan las gouiatos hilauon la lan e lou lin, quan se countauon aqueros causilhotos que se bouton aci cado an…Las aimerats pas las belhados, hèi ! lous jouéns ?
Illustration : image google Ministère de l’Agriculture…. (guéret = champ labouré non ensemencé)