Touts felibres (3)
Lous bieils qu’aimon lou petit bilatge oun èron basuts : lou clouquè oun sounauon l’Angèlus maitin e sé ; la gleizeto touto bestido de gèdro ; la plaçoto oun batalauon tout dimeche au sourtit de la messo maitiau, oun hazèuon à las quilhos, brèspos ditos, oun dansauon lous roundèus, bieils e jouéns touts mesclats, au soun de la bièlo e dous biulous …
L’aimerats pas, lou petit bilatge ?
Lous bieils qu’aimauon la Franço ! que l’aimauon aus jours de plazé, quan tout anauo coum ac boulèuon ; aus jours de dol, quan l’estrangè trabucauo aus couhis dambe lous pès de sous chibaus. E sabets ço que hazèuon lous de praci ?
Lous de praci, que jougauon la flauüto aus jours de la patz, que sabèuon tabé da de l’espaso, coum perduts, aus jours de la guerro.
Gens de Gascougno, mous amics !
Paisants de Gascougno !
Soun pas touts felibres, aci ? E doun lous bieils an boutat l’esclop, heran pas, nous aus, nosto pèado ? … Haut ! dounc !
Haut encoèro !
E bibo Franço ! E bibo Gascougno !
Lou Cascarot