Lou Courbas e lou Renar .

Meste Courbas, ser un aubre pincat,
Qu’auèuo à soun bèc un hroumatye.
Meste Renar, p’ou herum alisiat,
Li dits, en soun lengatye :
« I adiu, Moussu Courbas !
Coumo ès beroy , luzen, e coumo e-m semblos gras !
Sin menti, se lou toun rematye
Es fin e cla coumo lou toun plumatye,
Qu’és lou mè bèt d’ous abitans dou bos . »
A’n aquet coumplimen l’auzèt, de counten qu’èro,
Ende mustra coumo sa boès e bèro,
Aubris un larje bèc, e s’escapo lou tros.
Ansta lèu, lou Renar que se l’amasso
E dits : « Brabe Moussu,
Saberas que tout courtizayre casso
Per biue aus despens de l’escoutayre bestiasso,
E ma lesoun que bau un hroumatye, segu ! »
Noste Courbas que-s plego la troumpeto
E s’en ba, ‘n abacha la coeto,
Badinat e counfus, de hounto coeyt à miey,
En jura, mè trop tar :
« M’y gaheran pa mey ! »

J.Villeneuve ( Montréal – du – Gers )

Précisions de Maurice Serres :
La fable a été publiée dans l »Armanac de la Gascougno » de 1928. Les auteurs de la revue, dans le souci d’intéresser un maximum de lecteurs, publiaient intégralement les articles rédigés dans la forme du « parler local » (lou Parla d’Auch, de lectoure ou, comme ici, de Montréal)