Dauant lou Jutge.
Bèt tems a, ça-m countauo moun cousin, lou Cascarelet d’Abignoun, se pleitejauo un afa dauant lou tribunal. E lou bielh Jaquet Patarin, quan la Marioun, sa henne auouc dit ço que sabèuo, s’auancèc à soun tour end’ac dise, et tabé.
« Boste nom, ça digouc lou Jutje .
– Jaquet Patarin, l’ainat dou defunt Simoun Patarin – que lou Boun Diu lou beje ! –
que sèro maridat dambe la Trèso de Gisclet,- que lou Boun Diu la beje ! e que …
– Ba bien. Boste doumicile ?
– Doumesticos ? Moussu lou Jutje, n’auèn jamès auut nat ; qu’auèn toutjours hèit nous aus,la henno e jou, noste petit trabalhoun.
– Oun demourats ?
– Que soui de Majan. Que demouran a la Bastideto .
– Quant auèts de téms ?
– Quant èi de téms ? … Quant èi de téms ?… Oh ! aco, moussu lou Jutje … »
E lou bielh Jaquet , en se rebira de cap à la Marioun, sa henno, ça-u hè :
« Quant auèn de tems, Marioun ?
– Oèro, lou men amic, ça dits la Marioun, es agit d’ac sabe .Hè toun coumpte :
Auèuon binto – tres ans quan mous maridèn.
– Atau qu’es, Moussu lou Jutje. Binto- tres ans quan mous maridèn , que moun praube pai
-lou Boun Diu lou beje- mous balhèc lou Negre, que l’auèn oardat 15 ans :
un chibau, Moussu, que n’auèn pas jamès auut soun parioun . Disèuon dounc 23, e 15 aco que hè… bien 38.
– Mès, praube ome ! …
– Escusats … que croumpèn après lou Fend-l’air, que mous durèc 11 ans ;
11, disèn, e 38, auèn dit, aco que hè 49 … Permetèts … 49 ;Auoun après lou Gris, uo
petito bestio, Moussu, mès biu coumo un lambrét, e testut ! Hascouc bien soun serbici ! »
Lous jutjes s’espoutichèuon d’arrise.
« 19, disèn, e 49, que hèn …68 ? bertat ? Quio. Adaro, bous dirèi, i aura 8 ans per
Toutsans , qu’auèn la Cabaloto, uo bestio tarrible, Mouss ! Mès, paurugo…e defecilo à mia ,defecilo !.. .68 auèn dit, e toutaro 8, que hèn 76.
E be, adaro , Moussu lou Jutje, coumptats milhou, bous, se boulèts. Jou, que cresi moun coumpte juste, e qu’entrerèi ballèu , dins mous 77 … »
Lou Cascarot
… et pour vérifier votre parfaite compréhension … la traduction au prochain article.